میدانِ شوق عرصۂ پیکار بن گیا
ہر پھول تیرے پیار کا اب خار بن گیا
پہلے پہل تھا وہ مری یادوں کا ہمسفر
اب رفتہ رفتہ زیست کا حقدار بن گیا
وہ جس کی آرزو میں کٹی میری زندگی
افسوس میرے حق میں وہ تلوار بن گیا
کیا جانے کس طرف مجھے لے جائے بے خودی
اے دشتِ شوق! میں تو ترا یار بن گیا
جاوید! کیسے منزلِ مقصود پائیں ہم
ظالم زمانہ راہ کی دیوار بن گیا
۔۔۔۔۔۔۔۔۔۔۔۔۔۔۔۔۔
پھر تری یاد دِل جلانے لگی
آنکھ اشکوں سے ڈبڈبانے لگی
موسموں کے اداس چہرے میں
تیری صورت اثر دکھانے لگے
جب خزاں نے گِرا دیے پتے
تیز آندھی انھیں اُڑانے لگی
درد کے یاس خیز لمحوں میں
شامِ ہجراں بھی مسکرانے لگی
زندگی وہ عذاب ہے جاوید
جو مرے دِل کو ڈگمگانے لگی
